AMAMOS O MAR

P1210424

O martes 15 de outubro, o alumnado  de 3º e 4º de Educación Primaria, realizou a súa primeira saída do curso relacionada co Proxecto Documental Integrado, que leva por título AMAR O MAR.

Visitamos en primeiro lugar o Arquivo de Pesca, en Caión, onde Miguel nos explicou a importancia da caza da balea franca nos nosos mares. Mesmo nos mostrou unha costela e una barba do cetáceo.  A barba tiña máis de trescentos anos e non nos permitiu tocala porque se podía deteriorar.  Tamén nos explicou algunhas artes de pesca, como a do cerco e o palangre e vimos un video de como se realizaba a caza da balea antigamente.

Tamén nos mostrou unha botelliña que contiña aceite de balea. Este produto tiña un gran valor e por iso se acabou coa vida destes mamíferos mariños.

P1210436

Despois fomos andando ata a cetárea, onde nos recibiu María José, que é bióloga. Vimos crustáceos como centolas, bois e  lumbrigantes. Explicounos como era o corpo destes animais, como diferenciar a femia do macho, a súa alimentación.. E deixounos tocalos!

Mostrounos a muda dun lumbrigante. Contounos que os crustáceos cambian o seu coiraza dura para poderen medrar. Cando efectúan “a muda”, quedan  co corpo brandiño, e teñen que agocharse dos outros animais, porque os poden comer máis facilmente.  Díxonos que ela viu como fixo a muda un lumbrigante na cetárea e tiveron que apartalo de xunta os outros, para que non lles servira de cea.

Tamén nos levou á depuradora, onde se limpan os mexillóns e as ameixas que lle chegan das bateas. Normalmente tráennos da Ría de Arousa. Sorprendeunos que un mexillón  poida filtrar dous litros e medio de auga ao día. Bebendo tanto, ten que quedar ben limpiño!

P1210467

Para rematar, Evaristo Domínguez descubriunos a “praia fósil” de Razo. A nosa intención era aproveitar para apañar plásticos por toda a praia pero….Empezou a chover! Que pena!